Kuata 4 Polokame Upega tafa’ilagi – Term 4 Programme

Polokalame mo le Upega Tafa’ilagi mo le Kuata 4, 2017 i Henesone.

O Ieova o lo tatou leoleo mamoe o Ia. E leai se mea tatou te matitiva ai. E muamua, e mulimuli o Ia i so’o se mea tatou te i ai. Fa’afetai! Fa’afetai! tele lava.

E fa’afeiloa’i atu ma le fa’aaloalo matua i lenei Kuata fou o lea tatou savalia fo’i, le toe kuata o lenei tausaga 2017. Malo le folau, malo le tauasa mai i le umi ma le faigata o lenei tausaga. O lenei ua toe o se ana ona tatou tuvae lea i le fa’aiuga o lenei tausaga. Ae alo maia se’i fa’ailoa atu fo’i polokalame a le fanau mo lenei kuata.

Igilisi: Tusiga solo, tauloto ma lauga.

O le a aoaoina le faitau, tusiaina, fa’ailoa ma fa’aali, fa’atino i luma o le vasega. Ia iloa ma talanoa ma tamaiti e fa’amalamalama ituaiga solo ma tauloto eseese. Ia fa’ailoa ma malamalama tamaiti i ituaiga lauga e fai i ni aso fanau, fa’aipoipoga, aso Sa o tamaiti, lauga mo le fa’aiuga o le tausaga 6.

Ia fa’aaoga le Upega tafa’ilagi e saili ai ituaiga solo, tauloto ma lauga ma talatalanoa i o latou taua ma fausaga.

Faitau tusi:

E galulue fa’atasi le faiaoga ma kulupu laiti o tamaiti i aso uma i le a’oa’oina o le faitau tusi. E ave tusi faitau a tamaiti i le fale e faitau ma se tagata matua, fai i ai fesili ina ia manino ma malamalama le tama/teine i le tala. Toe fa’amatala e le tama/teine le tala i ana lava upu. A malamalama loa ona galulue lea ini galuega fa’atino e i ai le saili uiga o upu fou o lo’o i totonu o le tala, saili upu fa’amatala, ma isi lava galuega fa’atino. A maea ona saini lea e le tagata matua lea le tusi faitau samasama a le tama/teine ona sau lea ma ia i le aoga i aso uma e siaki e le faiaoga ma tusi le aofa’i o po na faitau ai. E maua le fa’ailoga pe a o’o le faitau i le 25, 75, 100, 125, 175, 200………… Fa’amalosiau matua ina ia faitau tamaiti i po uma.

Sipelaina o upu:

E amata le kuata i le suega o upu e 100 mai le lisi a le aoga. Fa’avasega lea o kulupu ma ave ai upu ta’i 10 i le vaiaso e a’o, ona fai lea o le suega i aso Faraile taitasi. Ia iloa fa’aaoga upu i ni fuaiupu ma malamalama i ai.

Numera: Fua o le vevela ma le taimi.

Ia a’oa’oina le faitau o aso o le vaiaso i lona fa’asologa sa’o. Tau le taimi i le uati, itula ma afa itula. Fa’amatala ni mea vevela ma malulu, aso vevela, aso malulu. Fa’atusatusa ni mea vevela. Faitau uati eseese, uati e i ai vae, ma uati e leai ni vae. Faitau masina o le tausaga i lona fa’asologa sa’o. Fa’aaoga le Upega tafa’ilagi e saili ai iunite ma galuega fa’atino e fa’atatau i le Autu.

Talanoa i le taua o le Kirisimasi i le Itu i Matu, ma le Itu i Saute o le Kelope.

Tusiga Ata: Fa’amanatuina

Fa’ataua le 50 tausaga o le tatou aoga o le a fa’amanatuina ia Novema o le tausaga nei. Fa’aulufaleina ai fo’i le faleaoga fou a le tatou aoga.

Ni meaalofa e fa’amanatuina ai ni mea taua.

Talanoa i ata o le Pasefika, Maori, Saina, Initia ma nisi.

Saili i luga o le Upega tafa’ilagi mo ni alagaoa e fa’atatau i le autu. Su’esu’e le  fausiga o ituaiga ata eseese. Ata e fausia mai i le siapo, launiu, pepa lanu, pepa iila, laufala/laupaono, fuala’au, figota, fatu la’au, laupapa, vali, tivaevae, Diwali art, ata Saina ma isi.

Ta’aloga ma le Saogalemu: Fa’agaioiga o le tino ma iloa tulafono.

Tamo’e, oso, togi, afeleti. Tamo’e i auala eseese, eg, tamo’e laititi, tamo’e umi.

Fa’aaoga auala sa’o e oso maualuga ai.

Fa’ailoa auala sa’o e togi ai le polo.

Saogalemu: Saogalemu o le komiuniti ma le siosiomaga. O le tatou aia tatau ma le tulafono. O tagata ma le siosiomaga.

Tala i atunu’u eseese:

Fa’atusatusa Niu Sila ma isi atunu’u. Su’esu’e ituaiga meaai, laei, ata, siva, musika, meataua. Fa’ataua aganu’u, tagata ma o latou aga i fanua.

Ia malamalama pe fa’apefea ona vavalalata pe feso’otai nisi o aganu’u.

Saili i luga o le Upega tafa’ilagi, faletusi, aiga, ma lipoti mai ni auala e tutusa ai aganu’u, meaai, laei, ma isi.

Maori: Ia malamalama ma fa’aaoga ni upu e fa’atatau i aso fanau. Ia malamalama ma fa’aaoga fa’amanuiaga o aso fanau.

Feso’otai ma talanoa i ni mea taua ma nofoaga e fa’ataunu’u ai.

Molimana’o, ofa, talia, ma teena ni mea, valaaulia, ma manatu fa’aalia.

Fa’aaoga le Upega tafa’ilagi e saili ai le fa’atinoina o le autu.

Sauni fesili ma tali e fa’atatau i ni manatu/lagona fa’aalia.

Talanoa i upu e fa’atatau i le fa’amanatuina o ni mea taua.

Galuega e ave i le fale i vaiaso taitasi.

O aso Gafua o vaiaso taitasi e ave ai galuega a tamaiti e fai i le fale. E fesoasoani i ai matua ae tusi e tamaiti, e le tusia e matua. O galuega nei e aofia ai le Igilisi, numera, sipelaina o upu, autu o le kuata, Samoan.

Auai i le aoga:

E fa’atauaina lava le auai o tamaiti i le aoga i aso uma o le vaiaso. A le aoga ona vili lea o le aoga, pe text e fa’amatala i ai le mafuaaga o le le aoga o le tama/teine.

Toniga:

Ia atoa uma le toniga a le tama/teine i aso uma. O le kuata mulimuli lenei e mana’omia ai le pulou, se’evae o le tau mafanafana, ma ofu aoga o le tau mafanafana.

Ia manuia tele le sauni atu mo aoaoga o lenei kuata.

O faiaoga Samoa.